Hebreërs 13:5 - God self het gesê: "Ek sal jou nooit verlaat nie, jou nooit in die steek laat nie."  

Die nuus van die verspreiding van die COVID-19 virus, is oral volop. Maar agter die nuus is ‘n tragedie wat besig is om te gebeur. Veral met die seemanne. Skielik is daar onsekerheid. Hoe gaan dit met die gesinne tuis? Wat as ek self siek word – is daar vir my behoorlike mediese sorg iewers op die wye oseaan...

KAPTEIN JAKE* is reusagtig.  Sy is 'n ertsdraer wat vandag laag in die water lê onder die juk van haar vrag. Aan stuur van KAPTEIN JAKE, met 'n gelyknamige rang, is kaptein Stavos.  Grieks. Afgerond. Netjies.  In uniform.  Nie 'n ding uit plek nie.  Ook so in sy kajuit, waar Danie nou oor die dek staan en uitkyk.  

Vasklou vir lewe.  Dit was op daardie stadium die enigste verweer teen die woedende storm wat die reusagtige, maar bitter-klein skip geplunder het.  Met toue getem aan die kaai, inspireer die reuse skip vertroue asof onbreekbaar, maar in hierdie storm, aan die Afrika Weskus, raak die skip bloot dryfhout wat ongenaakbaar rondgeruk word deur die mag van die onstuitbare see.