+27 21 551 2694 cso@mweb.co.za

In 1991 het ons begin werk in die Port Elizabethse hawe. Ons het begin met ’n deeltydse werker, maar die werk het gegroei tot 'n voltydse pos!

Ons het ’n kantoor naby die hawe waar die sendingwerker Bybels en ander literatuur kan hou, terwyl die kantoor ook gebruik kan word om met seemanne te gesels.

 

Sendingwerker aan die werk

'n Krakerige stem, wat eers effe bewerig na die noot rondtas en hom dan net-net half per ongeluk raaksing, sit in met 'Happy Birthday'.  Ander meer nootvaste stemme val by sodat die verjaarsdag liedjie nou feestelik deur die eetsaal van die skip dreun.
 
Aan die ontvangkant is Apolito, 'n Filippynse seeman met 'n dik swart boskaas en 'n seunsgesig.  Dié sit op die punt van 'n lang tafel en met mes en vurk in die hand word hy, nou effe verleë, deur die res van die bemanning toegejuig.  Party skud sy blad en ander gee hom 'n stewige klop op die skouer.

Die hoofkok stap in met 'n skinkbord waarop 'n lawwe oranje koek, wat spesiaal vir die geleentheid gebak is, pronkerig staan.  Vir 'n oomblik is die atmosfeer lig en gemoedelik.

Danie is ook daar en kry 'n ekstra groot stuk van die vlam-oranje koek.  Later kry hy 'n oomblik om met Apolito te gesels wat groot waardering daarvoor het dat sy mede-bemanning die dag onthou het.  Hoe meer hul gesels, hoe duideliker raak dit vir Danie dat Apolito se hart maar omgekrap is.  Vandag mis hy die huis meer as ooit.  Hy mis hoe sy kinders hom gewoonlik op die spesiale dag opgewonde kom wakkermaak.  Hy mis koffie in die bed, om 'n geskenkie wat sy vrou met liefde uitgesoek het oop te maak.  Maar dis die prys ... hy sal hul eers oor baie maande van nou af weer sien.
 
Uit Danie se knapsak kan hy vir Apolito 'n geskenk aanmekaar slaan.  'n Mooi studie Bybel, en cd's met musiek.  Maar die waardevolste is die gebed wat Danie vir hom en sy gesin kan doen. Dit vervang nie sy geliefdes se teenwoordigheid nie maar, verduidelik Apolito glimlaggend, dit maak die dag meer draaglik.

Dalk klink dit nie na veel nie, maar as almal en alles waarvoor jy lief is ver is, dan is 'n klein handeling soos hierdie goud werd. En dis wat ons donateurs weer moontlik gemaak het.  Dit het iets kleins gedoen wat groots is.  Daarvoor is seemanne oneindig dankbaar en sê ons verskriklik dankie.